• خرجت من الحربى ١٢/٣ بعد ماعشت فترة الثوره الاولى كلها فى السجن وكنت ليل ونهار قدام التيليفزيون الجزيره والرأى واحيانا منى الشاذلى
• وطبعا شفت اهانه وضرب وتعذيب لكل اللى جه هنا كانت تصل فى بعض الاحيان للموت وعلى مشرحة زينهم
• وده كان العادى جدا بالنسبالى بعد صدمة وكلف المجلس العسكرى بإدارة شئون البلاد والناس مش فاهمين
• واقسم بالله العساكر كانوا نسخه من فيلم البرئ بيعذبو اعداء الوطن اللى خربوا البلد
• خرجت حاسس انى لازم يكون ليا دور حتى ولو بالنصيحه لازم اشوف طريق للحق
• والدة ظابط زميلى كانت فى واقفه فى واقفه قدام وزارة الدفاع اتخدت على س٢٨ تانى يوم خروجى
• عرفت وجريت على هناك لقيت شباب كتير وبنات واقفين فاهمين ان زملائهم من ٩ مارس جوه
• قلتلهم انا لسه خارج من السجن امبارح وزمايلكم هناك كنت لابس جزمه الطاما امريكى شافها واحد فيهم كان ظابط جيش وطلع اسمه تيكا دفعه ٩٥ من الهرم
• عرف انى ظابط وشك فيا اكون تحريات او مخابرات هو اتسجن قبل كده وعارف ناس جوه سألنى عليهم وجاوبته وقلتله انا ممكن اجيبلك تمام الناس دى من هناك
• واخد رقمى وبقى يسألنى عن بعض الاسماء فى بعض الاحيان وكنت اروح الشغل الصبح والتحرير بالليل
• لحد ما الميدان سحرنى بكرامه وحريه زى ما سحر ملايين كتير قوى
• وكنت فاشل فى الدخول وسط اي مجموعه بسبب الشك وانى ظابط وكنت باحس انى غير مرغوب فيا فبدأت ادور على بنى جنسي من الضباط
• وحضرت الجمعه ٢٧ وكان تانى يوم استفتاء تقسيم القوى الثوريه والناس بتاع نعم و لا وكنت شايف القاده اللى محترفين فى تفرقة الضباط بيفرقوا الناس
• بدأت ادخل على الصفحات اللى فيها بنى جنسى ضباط الجيش المصرى وضباط من اجل الثوره وحماة الطابيه ١ و ٢
• فى الوقت ده اتقابلت على النت مع ياسر بخاتى دفعتى وعمرو الطبيب اللى محبوس مع شومان ساكن جنبى
• واتكلمت مع ادمن صفحة ضباط من اجل الثوره واديتله رقمى وكلمنى قاللى انا شريف عثمان وواصله من الشتايم على المجلس العسكرى
• وكان بيقولى الضباط جبنا وعمرهم ما هايعملوا حاجه والمجلس جبنهم والامل فى الناس لازم الناس تفهم حقيقة المجلس ده
• بدأت تظهر هتافات شرفاء الجيش فين ودعوات على الفيس للنزول بزى مدنى يوم ١ ابريل وميرى يوم ٨ ابريل
• يوم ١ ابريل نزلت وما شفتش ظباط لحد العصر وده اللى توقعته كنت بادخل من الموبايل واحد كتب الضباط عند المجمع
• طلعت اجرى على المجمع ملقيتش حد وبعد شويه لقيت اتنين اعرفهم دفعه ٩٧ مش هاقول اسمائهم علشان ما اتقبضش عليهم
• وشويه كمان لقيت سته او سبعه شكلهم ضباط حلاقه وسوالف وماشيه مأفوشين جدا
• واحد فيهم هو النقيب مهندس ابراهيم الشرع قالنا انتو ظباط مش كده قلتله تمام قال طيب تعالو اسمك قلتله قاللى انت خرجت من السجن امتى من اسبوعين
• مش انت اللى كنت محبوس علشان الاغنيه قلتله بالظبط قاللى طيب تعالوا هانقف فى الركن اللى تحت المجمع هناك
• بدأنا نتعرف بسرعه المقدم اياد من المعهد الفنى المقدم خالد من المعهد وابراهيم الشرع وكان فى اتنين لبسين ميرى مشناهم فورا
• واتفقنا اننا هانتقابل يوم الثلاثاء علشان نشوف الجمعه ٨ ابريل هانعمل ايه
• اتقابلنا يوم الثلاثاء كنا حوالى ٣٠ ظابط نزل منهم الميدان ٣ بس
• قاعدنا فى قهوه قدام طيبه على بعد ٢٠ متر من المخابرات الحربيه لمدة ساعتين نتناقش فى احتمالات ٨ ابريل
• ماكنتش اعرف فيهم غير اربعه بس اتناقشنا عن نزول ميرى او ملكى وكنا بندرس الموقف واتفقنا نتقابل الخميس ناخد القرار النهائى
• بدأت اتواصل مع بخاتى على النت ولقيته مستاء جدا قلتله هانتقابل الخميس تمام تمام
• يوم الخميس من الصبح اتنين ماشيين ورايا ببجاحه مش بحرفيه وبيسلمونى لبعض
• فى اليوم ده قلت اكيد هايتقبض عليا النهارده وش وخفت على باقى الناس
• الدكتور عمرو كلمنى قاللى انا هاعدى عليك قلتله لا انا فى ورايا اتنين مراقبه لو عرفت اصقتهم هاجى وخليته يوصل لياسر بخاتى
• راح عمرو وقابل ياسر والناس واتفقوا انهم يتقابلوا فى محطة مترو عين شمس الجمعه بكره ٩ الصبح
• حضر المقابله اياد وخالد واحمد الخولى ورامى وياسر وفهمى وعمرو وناس ثانيه فى بيوتهم دلوقتى
• واتفقوا انهم هايقفلوا الموبايلات لحد الصبح ويتجمعوا بلبس ميرى فى المحطه ولو العدد وصلوا ١٠٠ ضابط ينزلوا واكيد مئات الضباط هاتنزل بعدهم
• طيب هاينزلوا ليه علشان يفهموا الناس الحقيقه ويطالبوا بمجلس رئاسي مدنى ومحاكمة المخلوع وكل طلبات الثوره
• طيب ليه مافكروش فى انقلاب عسكرى مسلح علشان كان الدم هايبقى للركب لكن هما فكروا فى قاده محترمين يتولوا الجيش ويطهروه ولا خلاف عليهم
• المهم حاولت اوصل لحد منهم فشلت قفلوا النت والموبايلات ورامى قال لياسر وديع مش مشكله هو كده كده هاييجى
• روحت الخميس لقيت اختى الوحيده هبه قالت لأمى بكره فى ظباط نازلين بلبس ميرى وابنك اكيد منهم
• حرام عليك انت لسه خارج من السجن عايز ترجع تانى بلاش تبهدلنا وراك وعشان خاطر سيف ابن اختك وهكذا
• وانا كل همى بكره ملكى ولا ميرى يا ترى قرروا ايه قررت انزل ملكى واخد شنطه على ظهري فيها الافرول ولو لقيتهم ميرى اغير هناك
• صحيت صباح الجمعه صليت واحتسبت العمل زى ايام السيل اللهم انى احتسب هذا العمل عندك فاكتبه اللهم لى فى ميزان حسناتى
• واجعله شاهد لى لا على وارفعنى به درجه وحط به عنى خطيئه اشهد ان لا اله الا الله واشهد ان محمد رسول الله
• شهادة عليها نحيا وعليها نموت وبها نجاهد فى سبيل الله وعليها نلقى الله
• لبست جينز ازرق على البياده الرملى وتيشرت احمر وشابوه السيل وشنطه على ظهرى فيها الافرول
• ابلت ابويا وانا نازل قاللى رايح فين قلتله نازل رايح مشوار قاللى فين قلتله قريب هنا ما تقلقش
• فى الطريق امى كلمتنى انت فين قلتلها رايح الميدان قالتلى يا تيجى تاخدنى حالا يا هانزل اجيلك
• قلتلها هاتتعبى ومش هاتستحملى وانا مش عارف هارجع امتى ومن جوايا والله باقولها مش عايز اموت قدامك
• كنت متوقع القناصه هايخلصوا اول ما نركب المنصات وكنت شايف ان ده انسب قرار هايخدوه والطرف التالت يشيل
• رجعت اجيبها ونزلنا وصليت الجمعه وكنت على مشارف الميدان
• دخلت الميدان لقيت ياسر ورامى وظباط تانيين لسه مش مميزهم وعمرو لا وجود ليه
• الظباط اتقابلوا فعلا فى محطة عين شمس حوالى ٣٠ ظابط فهمى قالهم يا جماعه كده ما ينفعش احنا قليلين نرجع ونجهز بشكل اكبر ورفض البعض
• قالوا احنا نزلنا خلاص واكيد متراقبين مش هاينفع نرجع وده كان رأى تسعه والباقى رجع
• ياسر وحسين ورامى وجعفرى وبدير وابو الحسن ومصطفى عبد المجيد وحنفى وملازم فى البيت دلوقتى
• نزلت لقيتهم على المنصه اللى قدام كنتاكى امى قدامى سيبتها قدام مع السيدات وطلعت سلمت عليهم كان حنفى بيقول قصيده وادونى المايك
• قلت الاستاذه نواره نجم بتقول ان الظباط اللى هاينزلوا دول ظباط خونه
• فانا احب اقولها لو ميدان الشرف ده لما ننزله نبقى خونه احنا بنفتخر اننا خونه
• هانتاخد فى المخابرات ومستقبلنا هايضيع مستقبلنا ما يجيش نقطه من دم الشهيد اللى راح
• امى انهارت فى البكاء قلت لياسر انا هاروحها واجى انت غيرت فين قاللى احنا جايين كده
• روحتها وانا بزعق ومتنرفز جدا وكإنى سيبت المعركه واعنفها لما انتى خايفه على ابنك سيبتيه يدخل الكليه الحربيه ليه
• انتى فاكرانى ظابط صاعقه هاقعد جنبك منا فى يوم رايح ومش راجع انتى فاكره ايه وهى تعيط وانا ولا عندى دم
• وانا خارج كان ضباط من ٧٧٧ واقفين على بنك ندهولى سلمت عليهم وقالولى خرجت امتى وانا من جوايا بقول قصدكم اكيد راجع امتى لانى عارف اللى فيها
• روحتها وقعدت تقولى سيب الشنطه وانا اقولها مش هاينفع وتعيط واحاول اهديها كانت الدنيا ليلت اتسحبت ونزلت وانا فى الطريق كلمت ياسر على الموبايل
• سألته على عمرو قاللى ماجاش استغربت جدا لأن عمرو كان متحمس جدا جدا
• وصلت الميدان كانوا نزلوا من المنصات وواقفين فى قلب الصينيه وحواليهم دايره بشريه
• وقبل ما اوصلهم كان وصل محمد رفعت اللى راح يركب الستاير علشان كان جوازه ٢٧/٧ وملازم اول مهندس احمد رشاد
• والنقيب محمد ابو زيد جاب حوالى ١٥ ملازم ونزل بيهم من السويس على الميدان
• بدأت تندع ضباط ودار حوار بينى وبين ياسر وحسين انتم ناويين على ايه قالولى اعتصام
• قلت لياسر فكرة ان احنا نقف وهما حولينا ده مضيقانى الناس دول احنا اللى بنحميهم مش العكس قاللى هانعمل ايه احنا قليلين حوالى ٥٠
• احنا لازم نصمد للصبح المعاهد كلها هاتتحرك الصبح هاينزل اكتر من الف ظابط الصبح قلت فى بالى لو دى حقيقه مش هايطلع علينا الصبح
• قاللى انت معانا قلتله اكيد طبعا وقلت احنا هانطول ارجع العربيه البيت وارجع ونقعد بقى خلاص
• اول ما خرجت من الميدان عمرو كلمنى قلتله انت فين قاللى فى طلعت حرب ميرى ومعايا اتنين قلتله اطلع على الميدان هاتلاقيهم فى الصيني
• وانا فى الطريق اتصل بيا ضباط سيل كانت مكالمات شبه وداع تقريبا وحزن وحاجات من دى
• وصلت عند البيت طلعت امى قالتلى انت جيت قلتلها ااه ادخلى نامى يا ماما ما تقلقيش ودخلت الحمام والباب خبط
• وامى فتحت وسمعت هو فين ولقيت باب الحمام بيتكسر عليا وحوالى ١٢ هلف بالسلاح من المخابرات اثبت اثبت اثبت فين سلاحك
• وانا بابتسم واضحك واقول امى والله ما تخافى دول ظباط زمايلى ما تقلقيش وبدأت اتشد من اربعه احجام عائليه
• ابويا بيزعق وانا مبتسم وامى مخدوده وبتعيط وبحاول اهديها لبست تريننج ميرى وكوتشى ونزلت
• ركبت ميكروباص متفيم وقدامه جيب شيروكى ووراه جيب شيروكى واتكلبشت واتغميت
• قلت للظابط لزمته ايه الكلام ده منا عارف انا رايح فين هو انا غريب قاللى امنع الكلام دى تعليمات وقال للصف ظابط كلبشه وغميه كويس
• وكنت عارف ان الموضوع امام سينما طيبه يعنى عشر دقايق من البيت وفعلا حصل كانت حوالى الساعه واحده
• عسكرى صوته صعيدى بيحاول يتكلم بحده علشان زبونه يخاف انزل درجه امشى على طول يمين شمال وانت متغمى لكن ما يعرفش لسه ان زباينه المره دى ظباط
• ودخلت الاوضه بتاعت التحقيقات على كرسي الامتحانات الخشب وبدأ التحقيق لحد ٩ صباحا تانى يوم
• وخرجت من الاوضه فى طابور من الظباط كنت شايف بيادتهم وقفونا وشنا فى الحيط استعداد لدخول مكان ما
• المكان كان طرقه عرضها متر ونصف مليئه بالزنازين على الجانبين مساحة الزنزانه متوسط متر ونص فى متر ونص
• الزنزانه فيها بطانيه ميرى عالبلاط وبدون كهرباء اشبه بالقبر
• ويرميلك رغيف عيش عليه معلقة مربه صباحا من الشراع بتاع الباب واخر ليلا
• نمت وصحيت على اصوات بتكلم بعضها احنا فين ايه اللى بيحصل قمت بصيت لقيت محمد رفعت فى الزنزانه اللى قدامى
• بدأت افهم الناس احنا فين وايه اللى هايحصل علشان انا جيت قبل كده فى الاغنيه وعارف
• وبدأت الظباط تتوالى على المكان واحد تلو الاخر لحد حسين وكل واحد يحكى عن المجزره واللى حصله فيها
• بالمناسبه وانا خارج من الميدان كلمنى ضابط مظلات تقريبا بيبكى وبيقولى جاتلنا اوامر نهجم عليكم نعمل ايه قلتله اللى انت شايفه صح اعمله
• طبعا حصلت مجزره راح بسببها الشهيد على ماهر ويقال والله اعلم ثلاثة ضباط لكن ماحدش يعرفهم بصراحه
• يوم عشره اخدونا خمسه خمسه متكلبشين ومتغميين ودخلونا مكتب كده عندهم وشاله النظاره مين دول قالوا دى النيابه اتفضل امضى
• نمضى على ايه فتنه وسلوك مضر ومناهضة المجلس العسكرى والتحريض على قلب نظام الحكم والعقوبه من التوجيه وحتى الاعدام
• قلتله اثبت انى داخل عليك متغمى وانتى اللى جيتلى المخابرات وانى عيز محامى واثبت وكمل التحقيق ولا كإنى قلت حاجه
• وفضلت العمليه تصفصف لحد ما صفت على كوكتيل ٢٢ ضابط فقط
• كانت ظباط المخابرات بيحولوا يقنعونا انهم مخبيينا من الناس علشان الشعب عايز يدبحنا
• كنا بنقعد نستفذهم بأغانى وطنيه وكلام عن سلبيات وفساد داخل القوات المسلحه وبعد شهرين كنا واخدين عشر سنين سجن واتعادة المحاكمه واصبحت ٣ سنين
• وفى مشاده كلاميه مع ضابط امن السجن طلع يجرى ويعيط للواء محمود حجازى حول سته مننا المحكمه
• والسته دول اتحكم عليهم بستة اشهر زياده فوق المده الاصليه وفرقونا على ثلاث سجون
• وبعد اربع شهور انضملنا ضباط ٢٧ مايو عمرو جميل وهانى شرف وفؤاد الدسوقى
• وخرج العقيد عمرو والرائد النجدى لأنهم كانوا واخدين سنه وفى خمسه المفرود يخرجوا فى تحرير سيناء لانهم سنتين
• والباقى مشرف لحد ٢٠١٤ وعليكم خير شباب وطنى عاشق تراب بلده قرر يخرج عن صمته بكلمة حق لله ولبلده ولشباب بينزف ويموت ومضحوك عليه
The State of Tawfiq 
انتم اشرف اجناد الارض سدد الله خطاكم وثبتكم واحنا معاكم بدمنا وروحنا وعمرنا ماهنفرط فحقكم النصر قريب ان شاء الله